கலைஞருக்கு ஒரு கடிதம்..

மதிப்பிற்குறிய கலைஞர் அவர்களே!

தாங்கள் மீண்டும் முதல்வரானதற்கு என்னுடைய வாழ்த்துக்கள்.

ஐந்தாண்டு கால இடைவெளிக்குப் பிறகு ஆட்சியைப் பிடித்திருக்கும் தங்களிடம் என்னைப் போன்றவர்கள் என்ன எதிர்பார்க்கிறோம் என்பதை சுருக்கமாகக் கூறவே இக்கடிதம்.

முதல்வர் இருக்கையில் அமர்ந்தவுடன் 'நான் இடும் முதல் கையொப்பம் வறுமைக் கோட்டிற்குக் கீழே இருக்கும் குடும்பத்தினருக்கும் ஒரு கிலே அரிசி இரண்டு ரூபாய்க்கு வழங்க உத்தரவிடும் ணையாகத்தான் இருக்கும்' என்றீர்கள்.

நல்ல திட்டம். வரவேற்கப்பட வேண்டிய திட்டம்தான். இல்லையென்று கூறவில்லை. ஆனால் அதை நிறைவேற்றுவதில் உள்ள சிக்கல்களை நீங்கள் எண்ணிப் பார்த்து ஒரு தெளிவான வரைமுறையை வகுக்க வேண்டும் என்று கேட்டுக்கொள்கிறேன். தாங்கள் அரசு மான்யத்தை உபயோகித்து செயல்படுத்த உத்தேசித்துள்ள திட்டம் ஏழை எளியோர்க்கு, அதாவது உண்மையிலேயே வறுமைக் கோட்டிற்கு கீழே உள்ளவர்களை மட்டுமே சென்றடையவேண்டும் என்பதை நீங்கள் பார்த்துக்கொள்ள வேண்டும். எந்த ஒரு சூழ்நிலையிலும் தங்களுடைய கட்சி தொண்டர்கள் இத்திட்டம் சரிவர செயல்பட இடையூறாக இருக்க தாங்கள் அனுமதிக்கலாகாது என்றும் கேட்டுக்கொள்கிறேன்.

இவ்வாணையில் கையொப்பம் இட்ட அதே மூச்சில் தாங்கள் கையொப்பம் இட வேண்டிய வேறோரு ஆணையும் இருக்கிறது. அதுதான் வேலையிழந்து நிற்கும் பத்தாயிரம் சாலைப் பணியாளர்களை மீண்டும் பணியமர்த்தும் ஆணை. அத்துடன் கடந்த நான்காண்டுகாலமாக அவர்களுக்கேற்பட்டுள்ள பொருளாதார இழப்பையும் தங்களால் இயன்ற அளவு ஈடுகட்டவேண்டும்.

இரண்டாவது.. உங்களுடைய கடந்த ஆட்சிக் காலத்தில் தெரிந்தோ தெரியாமலோ.. அல்லது உங்களுடைய விருப்பத்துனுடனோ, இல்லாமலோ முந்தைய முதல்வர் ஜெயலலிதாவையும் அவருடைய உடன்பிறவா சகோதரியையும் குறிவைத்து பல விரும்பத்தகாத நடவடிக்கைகளை எடுக்கப்பட்டன.

அதுபோன்ற எந்த ஒரு நடவடிக்கையையும் மீண்டும் அவசரப்பட்டு எடுக்கலாகாது என்று கேட்டுக்கொள்கிறேன். அவர் மீது ஏற்கனவே தொடுக்கப்பட்டுள்ள சொத்துக்குவிப்பு வழக்கை தகுந்தபடி நடத்துவதற்கு கர்நாடகா அரசுக்கு ஒத்துழைப்பு தந்து நடத்திமுடித்தாலே போதுமானது. அவர் குற்றவாளியாக நிரூபிக்கப்படும் பட்சத்தில் அவருக்கு கிடைக்கும் தண்டனையே போதுமானதாக இருக்கும். அதை விட்டுவிட்டு மீண்டும் அவரைக் கைது செய்து அவர் மேல் தேவையில்லாத அனுதாபத்தை ஏற்படுத்திவிடாதீர்கள். என்னைக் கேட்டால் அப்படியொரு அரசியல்வாதி இருந்தார் என்பதையே மக்கள் மறந்துபோகும் அளவுக்கு நீங்கள் அவரை உங்களுடைய நடவடிக்கைகளில் இருந்து ஒதுக்கிவிடவேண்டும்.

மூன்றாவது. ஜெயலலிதா தன்னுடைய ஆட்சிக்காலத்தில் தமிழ்நாட்டை இந்தியாவிலேயே முதல் மாநிலமாக ஆக்கிக் காட்டுவேன் என்றார். ஆனால் அவருடைய ஐந்தாண்டு கால ஆட்சியில் எல்லா துறைகளிலும் தமிழகம் பின்தங்கிவிட்டது என்று பல பொதுக்கூட்டங்களில் புள்ளி விவரத்துடன் விளக்கினீர்கள். என்னைக் கேட்டால் அதையே நீங்கள் சவாலாக ஏற்றுக்கொண்டு உங்களுடைய ஆட்சிக்காலத்தில் தமிழ்நாட்டை உண்மையிலேயே முதல் மாநிலமாக ஆக்கிக் காட்ட வேண்டும் என்று கூறுவேன்.

நான்காவது. தங்களைப் பற்றி அடிக்கடி கூறப்படுவது. அதாவது வெட்டொன்று துண்டு இரண்டாக முடிவெடுக்காமல் பார்ப்போம், பார்ப்போம் என்று காலந்தள்ளுவது. முக்கியமாக தங்களுடைய கட்சியினர் ஊழலிலும், அராஜகத்திலும் ஈடுபடும்போது உடனே தட்டிக் கேட்காமல் இருப்பது. ஜெயலலிதா எதில் வெற்றி பெற்றாரோ இல்லையோ சென்னையிலும் அதன் சுற்றுப்புறங்களிலும்  அடாவடி அரசியல் நடத்திவந்த ரவுடிகளின் கொட்டத்தை அடக்கியது என்னைப் போன்ற நடுத்தரவாசிகளுக்கெல்லாம் மிகுந்த ஆறுதலாக இருந்தது. அதே மாதிரியானதொரு சூழலை நீங்கள் உருவாக்க வேண்டும்.

ஐந்தாவது. அமைச்சரவை அமைப்பது. தங்கள் மேல் இருக்கிற இன்னுமொரு குற்றச்சாட்டு. வயதானவர்களுக்கே எதிலும் முன்னுரிமை என்பது. தங்களைச் சுற்றி தங்களுடன் கட்சி துவக்கப்பட்ட காலத்திலிருந்தே உண்மையுடனும், விசுசாசத்துடனும் இருந்தவர்களிடம் நன்றியுடன் இருப்பதில் தவறேதும் இல்லை. ஆனால் அதே சமயம் தங்களுக்கு ஒதுக்கப்பட்ட இலாக்காவினை திறம்பட நடத்திச்செல்லக்கூடியவர்களாக இருந்தால் மட்டுமே அவர்களுக்கு தங்களுடைய அமைச்சரவையில் இடமளிக்க வேண்டும். கடந்த ஆட்சிக்காலத்தில் ஊழலுக்கு இலக்காகியிருந்த எவரையும் இம்முறை அமைச்சரவையில் இடமளிக்காமல் எச்சரிக்கையாயிருக்க வேண்டும். இளைஞர்கள், பட்டதாரிகள், சுயமாய் சிந்தித்து முடிவெடுக்கக் கூடியவர்கள் இவர்களுக்குத்தான் அமைச்சரவையில் முன்னுரிமை அளிக்க வேண்டும்.

ஆறாவது. வாரிசுகளுக்கு முன்னுரிமை வழங்குவது. தங்களுடைய குடும்பத்தாரை எப்போதுமே அரசு பதவிகளிலிருந்து தாங்கள் விலக்கி வைத்திருந்தீர்கள் என்பது எல்லோருக்கும் தெரியும். அது இந்த ஆட்சியிலும் தொடர வேண்டும். தங்களுடைய மகன் என்ற காரணத்திற்காகவே திரு. ஸ்டாலின் அவர்களைப் பற்றி பலரும் பலவிதமாக பேசி வருகிறார்கள். சமீபத்திய கணிப்பில் அவருக்கு ஒரு சதவிகித வாக்காளர்களே முதல்வராக வர விருப்பம் தெரிவித்துள்ளனர் என்பதைக் கேட்க வருத்தமாகத்தான் இருந்தது. தாங்கள் அவரை மீண்டும் சென்னையின் மேயராக இருத்த வேண்டும். அவர் கடந்தமுறை மேயராக இருந்து ஆற்றிய பணிகள் மிகச்சிறந்தவை என்பது என்னைப்போன்ற பலருக்கும் தெரிந்ததே. ஆகவே அவர் தங்களுடைய அமைச்சரவையில் இருப்பதை விட தனித்து சென்னை மாநகராட்சியை நடத்திச் செல்வதே நல்லது என்று நினைக்கிறேன். இரு பதவிகளை ஒருவரால் வகிக்கமுடியாதென்றால் அவர் எம்.எல்.ஏ பதவியை ராஜிநாமா செய்தாலும் நல்லதுதான் என்று எண்ணுகிறேன். அத்துடன் திரு.மு.க அழகிரியை தங்களுடைய நேரடி கட்டுப்பாட்டுக்குள் வைத்திருப்பதும் வேண்டும்.

ஏழாவது. நீங்கள் தேர்தலின்போது கொடுத்த மற்ற வாக்குறுதிகள். அவற்றுள் விவசாய பெருங்குடி மக்களுக்கு வழங்கப்பட்டிருந்த கடனை ரத்து செய்வதைப் பற்றி மட்டும் கூற விழைகிறேன். அதில் ஐந்து ஏக்கர் மற்றும் அதற்கு குறைவான விவசாயிகளுக்கு வழங்கப்பட்டுள்ள கடன்களை மட்டுமே தாங்கள் ரத்து செய்ய வேண்டும். பணம் படைத்த முதலைகள் பெற்றிருக்கும் கடன் தொகையையும் ரத்து செய்வதில் எந்த பயனும் இல்லை. மற்றபடி கேஸ் அடுப்பு, கலர் தொலைக்காட்சி பெட்டி வழங்குவது எல்லாம் இப்போதைக்கு முக்கியமில்லை என்றும் கூற விழைகிறேன். தவறாக எடுத்துக்கொள்ளாதீர்கள். இவ்விரு திட்டத்தையும் செயல்படுத்த முயலும்போது ஊழல் நடக்க வாய்ப்பிருக்கிறது. மக்களுக்கு நல்லது செய்யப் போய் வயதான காலத்தில் தேவையில்லாத தலைவலியை வாங்கிக்கொள்ளாதீர்கள்.

எட்டாவது. போலீஸ் நிர்வாகம். ஜெயலலிதாவைப் போலவே காவல்துறையை தாங்களே தங்களுடைய பொறுப்பில் வைத்துக்கொள்ள வேண்டும். அவர்களை எந்த ஒரு சூழ்நிலையிலும் தாங்கள் வரையறுத்த எல்லைக்கோட்டை விட்டு தாண்டிச்செல்ல அனுமதிக்கலாகாது. முந்தைய ஆட்சிக்காலத்தில் நியமிக்கப்பட்டவர்கள் என்ற காரணத்திற்காக எவரையும் தகுந்த காரணம் இல்லாமல், சம்பந்தப்பட்டவர்களிடம் இருந்து தகுந்த விளக்கம் கேட்காமல் இடம் மாற்றம் செய்யக்கூடாது.

ஒன்பதாவது. மதுபானக் கடைகள். ஒரு அரசின் தலையாயப் பணி ஆட்சி செய்வ்துதான். வணிகம் செய்வதல்ல. ஆகவே மதுபானக் கொள்முதல், சில்லறை விற்பனை எல்லாவற்றையும் தனியார் மயமாக்கிட வேண்டும். விமர்சனங்களுக்கு அஞ்சாமல் தாங்கள் நேர்மையான முறையில் இவற்றை செயல்படுத்த வேண்டும். அதே போன்றதுதான் கல் மற்றும் மணல் குவாரிகளையும்.. ஆனால் அதே சமயம் எவர் மீதும் பழிவாங்கும் (மிதாஸ் நிறுவனத்தைப் பற்றித்தான் குறிப்பிடுகிறேன் என்பது உங்களுக்கு தெரியும்) எண்ணத்துடன் இத்திட்டங்கள் செயல்படுத்தப்படலாகாது என்பதையும் கருத்தில் கொள்ளவேண்டும்..

பத்தாவது மற்றும் இறுதி வேண்டுகோள்.. தங்களால் உடல் ரீதியாக என்றைக்கு முதலமைச்சராக திறம்பட பணியாற்ற இயலவில்லை என்று நீங்கள் உணர்கிறீர்களோ அன்றைக்கே, அந்த நிமிடமே தாங்கள் தங்களுடைய கட்சி உறுப்பினர்களை சுதந்திரமாக, எவ்வித தலையீடும் இல்லாமல் ஒரு முதலமைச்சரை தெரிந்தெடுக்க வழிவகுக்க வேண்டும் என்று கேட்டுக்கொள்கிறேன்.

அதே சமயம் இனி வரும் ஐந்தாண்டுகாலமும் தாங்கள் முதலமைச்சர் பதவிலியிருந்து திறம்பட பணியாற்ற தங்களுக்கு நல்ல உடல் வலிமையை அளிக்க வேண்டும் என்று இறைவனிடம் பிரார்த்திக்கும்,

தங்களில் உண்மையுள்ள,
...